Donk an parlann lédikasyon bann zanfan mwin la kom romarké shakinn néna son lidé , shakinn néna son téori, son métode,son filozofi dsi la késtyon. Néna sak i di li konsèye la manyèr forte pars néna arienk la manyèr forte i marsh bien...Néna sak i di i fo fé lé shoz an doussèr, f opa énèrvé, i fo ésplik lé shoz.Si i konpran pa, i fo wi ésplik ankor :san foi dsi lo métyé romète out l’ouvraz poliss ali sann sèss é ropoliss ali-konm in l’otèr klassik , Boileau si mi tronp pa téi di anparlann bann vèr i ansèrv dann lo fonnkèr .
An parlann la dousèr épi son fors pou transform lé shoz m’a rakont azot in pti zistoir .Mi rapèl in manifèstasyon pou kal la frode éléktoral. Nou l’avé fé sa in zour d’radyo kroshé.L’avé in kantité d’moun té apré atann é toudinkou zot la antann « Assé avèk la frode, assé avèk la frode » .Séèrèss la débarké avèk toutt lo tintoin gaz lakrimojène, kou d’matrak é koatéra.Mi sava pa dir azot la suite mé in robondisman.
An parmi lo bann manifèstan l’avé in koifèr é lété pa lo moin déssidé.. Landomin son kliyan la débark dann son salon, la komanns koz dsi la manifèstatsyon .Li la éspliké pou koué la manifèsté, é lo ga la di : « Oui, mé pou kossa la anprofite in fète popilèr pou fé sa ? ».Lo koiffèr la sort sé gon épi la di : « Sort aou-la sansa mi kok aou in razoir ! » .Lo kliyan la pa domann son rèst, li la baré. Donk li rakont sa son dirizan é son dirizan i di ali : « I fo éspliké é éspliké ankor. ». Son dirizan lété in dissip la dousèr.
Landomin dann son salon in ot kliyan i débark épi i romète lo problèm dsi lo tapi.L’èrla lo koiffèr i mète a éspliké, roéspliké, dézèspliké,arien afèr pou lo moun ète dakor. Li konpran son métode i trouv son boute .Alor robolotte, li sé d’dir son kliyan : « Sort aou la, sansa mi kok aou in razoir ! ».Robolotte, lo moun la shapé san domann son rèst.. Mézami mi rakont azot zistoir-la pou dir azot si lé vré, konm i di : « La passyanss i guéri la gal ! », lé possib sa i mète in pé d’tan.