Na dé foi lé ankor pli pir é la réalité i dépass la fikssyon : konm kan in lassanblé i travaye sink sizan dsu in dossyé épi in n’ot assanblé i ariv épi li kass toute sak la fini fé, toute sak la fini fé avanssé. Lo pli gayar ka ké ni oi kan ni pass Sindni sé lo gran térin vag dovan Pti Marshé é sa i fé omoinss in kar d’syèkl sa lé konmsa. La kontinuité la manké ! Lo karaktèr détèrminé la pran lo plass lo karaktèr indétèrminé.

Mé a bien rogardé néna dé shoz lé pa an CDD, zot lé pèrmanan. Kossa par ébzanp ? Lo pli pèrmanan mi oi sé lo pèp é mi domande amwin pou kossa lo pèp i pé pa suiv in n’afèr i dir dann tan, i dépass lo sinp manda d’in élu… Lo pouvoir judissyère li ossi li lé pèrmanan. L’administrassion ossi lé pèrmanan mé a bien rogardé sa lé sou lé zord d’in pouvoir an CDD. Alor lapa zot la solission.

A bien kalkilé pou kossa in konstitission i diré pa ké dann déssèrtin domène — konm l’anvironeman — sé lo pèp k’i pran la déssizyon par référandome dsu la késtyon lanvironemen. Si lo pèp la désside i fo fé par ébzanpe in foré in l’androi pou in duré d’karantan. Si i la voté par référandome, pèrsone i dovré gingn rovnir dsu in désizyon konmsa.

Néna lo kour tèrme, néna lo moiyin tèrm, é néna lo lon tèrm é sète-la arienk lo pèp lé mètr ladan — a bon ékoutèr, salu.

Justin