Oté

« Si li fé sanblan mor, i fo fé sanblan antèr ali ! »

In kozman pou la rout

Justin / 5 out 2018

JPEG - 43.6 ko

Pou la vérité, ala in drol kozman pars mi koné pa koman sa i pé spasé d’antèr in sanblann mor. Antèr in mor ? Sa sé in n’afèr i ariv toultan é v’ariv anou in foi dann nout vi -Do préférans kan i ariv la finisyon. Mé antèr in moun i fé sanblan mor, mi oi pa bien l’afèr. Par l’fète, moin la koni in moun la mor dé foi dann son vi : in promyé foi li l’avé trèzan-i paré li lété an katalépsi-, épi in dézyèm foi par la soisant z’ané apré. Mi koné pa si sé pou sa, mé tout son vi li la viv an ralanti. Mé la pa tousala pars nou néna afèr avèk in provèrb donk li néna in sans i dépas son sans prop é sanm pou moin sa i vé dir si ou i fé sanblan i fo rann aou an sanblan galman : sanblan malad, sanblan médikaman ; sanblan travaye sanblan larzan ; épi z’apré sanblan mor, sanblan l’antèrman. Alé, mi lèss azot rofléshi la dsi é ni artrouv pli d’van. Sipétadyé !