Oté

« Si li fé sanblan mor, i fo fé sanblan antère ali »

In kozman pou la route

Justin / 11 mars 2021

JPEG - 43.6 ko

Médam, zé Méssyé, la sosyété kozman-la sa in kozman l’Afrik : i paré li sorte dann La répiblik démokratik lo Kongo, in gran péi, mwin la fine anparl èk zot na pwin si tèlman lontan. Donk néna kéktan mwin la lir kozman-la é mi koné pa pou kossa mé mi akrosh pa avèk li. Toultan mwin lé a d’mandé si sa la pa sinploman in kassaz ti bwa : zot i koné dann la kiltir popilèr i mank pa kozman pou kass lé kui. Mi pouré arète tèrla, sof ké mwin néna dan l’idé kozman-la li porte dsi lo mansonz : Na pwin pli gro mansonz ké fé sanblan ou lé mor, mé si wi fé sa, kossa i fé avèk ou ? Dann kèl kalité rolassyon i rante avèk ou ? Léshoz lé sinp si i di k’i répond a in mansonz par in mansonz. Mé fé antansyon avèk lo mansonz ! Zot i koné li fé flère, li fé pa lo frui, é arzoute èk sa son pate lé kourte é li pé fé trap ali vitman. Alé ! Mi kite azot rofléshi la dsi é ni artrouv pli d’van. Sipétadyé.