Matante zélida la ékrir :
Mon shèr nové, zordi, pou in foi, moin lé pa dakor avèk lo prézidan ; Sé pou lo késtionn fam-sèl. Na in minis la di i fo koup sa, na in n’ot la di i fo pa, épi lo prézidan la di li prétan pa i toush sa. Biensir, pou kontray amoin, so kou issi ou sar dakor avèk lo prézidan. Biensir, sa i aranz aou, éspès vakabon, konm di la shanson ou lé bien èz gingn in sipléman avèk so bann fam sèl la zourné, akonpagné la nuite.

Justin la réponn ali :
Mon vié matante, kossa ou i shante amoin-la ? Pèrsonn la pa parl fam-sèl, la parl “famiy nonbrèz” ; Sa in kart i donn aou rédiksion déssi biyé lo train kan ou nana in famiy nonbrèz, épi gouvèrnman i donn in l’ède la SNCF. Sa i égzis dépi lané 1920, épi na in malfondé d’minis té i vé koupé. Pou koué ? Sa akoz bann minist l’apré fé konkour pou oir kissa i koup lo plis, kissa i raz plis la pinte. Final de kont, la di i koup pa, mé sé la SNCF va pèy par li-mèm - démèrd ali ! - épi si li lé pa kontan, li na ka pran konstan.

Justin