Pars i sifi pa d’rouv son boush pou la vyande kui tonbe dodan. La plipar d’tan néna zintéré kontrère é sé sak i fé ké pou gingn satisfakssyon i fo wi amene la lite. Alon pran in légzanpe : ni di souvan lotonomi alimantère sé in bon n’afère pou nou épi pou toute zabitan i rèss dann bannzil. Ni di sa é nou néna rézon sirtou dann in ka konm zordi néna bande gran péi i kapare la nouritir dsi lo plan mondyal é lé zot i gingn lo rèst… Kan i gingn.

Sanm pou nou lotonomi alimantèr lé possib é sé in bon solission pou nou. Mé oila ziska zordi ni ariv pa gingn sa. Pou kossa ? Pars néna bande sossyété néna intéré ni trape pa zamé sak bonpé d’moune lé dakor avèk zordi. Zot i fé linpor-ékspor é zot i arondi zot konte larzan konmsa. Si ni amenn la lite nou va fini par gagné, mé nou lé oblizé amenn la lite pars dann sète afèr an avoir rézon sa i sifi pa.I fo galman ni oblize bande lobbi aksèpe noute rovandikassion.

Astèr amenn la lite pou mwin sé in l’obligassion é si la lite lé bien améné, normalman èl i réissi é dann toute domenn la vi noute pèp. Sa lé vré pou lékonomi, sa lé vré pou lo sosyal, sa lé vré pou lo kiltirèl é pou la défanss lanvironeman, sa lé vré dann domenn la lang. Mé la lite i doizète améné bien konm k’i fo : i fo pa ou lé toussél, i fo in politik d’inion, i fo lénèrzi an kantité dann in térin bien préparé.

Konm i di, si lo grin i tonbe pa dsi galé, li va poussé.