Matante Zélida la ékrir Justin :
Mon shèr nové, mon spès salté,
Mi éstime zot i doi ète kontan zot la ! Mi pans lo roi la pa z’ot kouzin, zot bann rouj-de-fon. Ou i oi pa a popré pou kossa ? Pou sak i apèl sondaz, sak i fé vote demoun avan l’votaz, sak i koz avèk in pti pé d’moun épi i kalkil tou l’moun i pans konmsa... Zot i oi pa in n’afèr konmsa i tyinbo pa d’boute ? La prèv, inn i di si, l’ote i di sa, é patatti é patata. Tan k’a zot, bann gogo, zot i pran sa pou larzan kontan ; Touléka, si d’moun i vote konm lo sondaz i di, moin sar blizé pansé, konm zoizo bélyé, zot nana léskréman dan la tète. Pran sa pou toi !

Justin la fé aèl pou répons
Mon vyé matante k’i koz touzour la boush rouvèr,
Konm d’abitide, mi an apèrsoi ou sé in fanm dé progré... moin l’avé poin doutans de sa. Zordi sé sondaz, ou lé pa dakor ansanm. Ou i koné, moin la fine antann moun byin, byin kulturé é tou, dir i fo pa fé in konte ansanm sondaz. Lé vré, sa lé pa in vérité lévanzil… lé vré, nana in marz l’érèr, mé si li lé byin fé, si li lé pa trafikoté, sa i done in bon l’idé déssi sak demoun i pans, momandoné. Astèr, si ou i pans sé lo pèp ké na tor, si ou i pans sé li ki s’tronp, l’èr-la, konm in gran lékrivin té i di : « I fo shanj lo pèp ! », mé konte déssi, fyé pa tro !

 Justin