Matante Zélida la ékrir justin :
Mon shèr nové, mon spès salté, vi koné in pé plis moin té i kass mon pos télé dimansh-o-soir. Pou kossa ? Sinploman pars la Droite la pa gingn in sèl zéléksyon, an parmi lé kat ké n’avé… koman l’a anfarine lo zyé d’moune don ? Koman l’a pa détak lo pyèz bann rouj de fon don ? I fo kroir zot nana in bon sigidi an touléka. Pars i fo joué avèk lo sor pou anbriye l’éspri d’moun konmsa. Sak moin lé sir, la pa in bougrèss kom moin zot va nyabou fé pran blan pou noir, ti-poul pou ti-kanar. Moin nana in kopine i di amoin, pétète zot i zoué avèk la frode é bann Droite i an apèrsoi pa. Sa i fé pa in n’afèr konmsa ! Pran sa pou toi !

Justin la fé pou répons :
Mon vyé matant k’i koz touzour la boush rouvèr ! A bon ? Noré fé la frode ? Promyé nouvèl pou moin ! Pars so kou issi, Sin-Pol konm Sin-Lui sé in délégasyon éspésyal la roganiz le z’éléksyon, é mi pans pa zot lété parti-pri, pars la Doite té i vèy azot konm lé dsi l’fé é bann z’alyansé té i fé parèy. Arzoute èk sa, la Droite de Frans la anvoy anou inn-dé mèrl blan pou ranfors bagar. Pétète sé so bann z’anvoiyé la fé pèrde azot ! I fo dir, konm noré di mon défin momon, té pa la flèr d’poi ké la anvoy issi ! Sansa sé lo Virapoullé, vi k’li la di : « Rényoné la pa bézoin nénène ! ». Moin pèrsonèl, mi pans lo moun la pa aksèp k’i falé vote ankor in kou, vi k’zot l’avé fine byin voté l’ané dèrnyèr ! M’a dir aou in sogré : « si lo pèp i vote mal, i fo shanj lo pèp » [1]. Lé sinp in !?

Justin

L’ésplikasyon inn-dé pti mo :

Sigide, sigidi : in sor

Anfarine lo zyé d’moun : boush lo zyé d’moun

Détaké : lo kontrèr sé "také", fèrm avèk in také

Vèy konm lé dsi l’fé : fé byin antansyon (pars dé lé i monte an vitèss san prévnir)

Mèrl blan : tui-tui, sansa zoizo kouyon

Lé pa la flèr d’poi : sa in flèr lé zoli épi i san bon