Mi souvien bien in fonnkèr dsi l’abolisyon l’ésklavaz. Lo tit ? « Kaf na sète po ! ». Mi ansouvien sé l’istoir lo fouète madam Desbassyns, inn-dé gro blan la séré pou lo ka lo tan lontan i rovien. Sak mi souvien bien sé ké lo poèt la di sa, sé Axel Gauvin… Rozman lo tan l’ésklavaz la pa rotourné, é lo fouète madam Desbassyns la rès antéré l’androi la mète ali zis avan lo vin désanm 1848.

Mi koné osi, nout péi La Rényon la konète aprésa inn-dé pèryod lété pa zoli-zoli pou son bann zabitan, sirtou bann ti kolon, lété pa bien agréab ditou. Ni pé anparl konmsa lo tan z’angazé épi lo tan la koloni. Dizon lo tan marésal Pétain par ébzanp !

Mé aprésa nou la koni lo tan Perreau-Pradier. Dizon lo tan bann préfé voiyou la dir dopi l’ané 1957 ziska 1981. Dann tan-la, in bazardier téi pèrd son karo bazar pars li té koni konm rouj. D’ot té i pèrd z’ot travaye. D’ot ankor té raplé dann La Frans par l’ordonans oktob 1960. Mi souvien mèm in ga l’avé fé foto bann CRS épi bann nèrvis dann por é Lo préfé la domann lo diréktèr la sékirité sosyal son tète. Rozman lo diréktèr, mèm in om de droite, la gingn la fors rézisté pa sédé.

Tan-la lé sirman lé déryèr nou ! Déyèr nou ? Sof ké in rédaktèr zournal, pa pli loin ké somenn dèrnyèr, la domann la tète in profésèr filozofi pars sète-la, paré-t-il, i réspèk pa la loi lo silans vi ké li lé kont lo syonism épi li di, li é kont sak bann l’oksidan i fé dann la Syrie épi li d. An dèrnyé, ala ké li irl pa avèk bann lou a l’okazyonn la mor Fidel Castro.

Donk i fodré kass son rin ! Donk siprime son post ! Donk I fo tak son boush dsi son gagn-pain. Si lo tan lontan, lo bon tan lontan sète Perreau Pradier épi sète bann préfé voiyou épi batayèr i rovien.