Sa i fé troi z’ané Fransoi Hollande l’é prézidan é moin pèrsonèl mi pans la pa trouv in bon solisyon pou in bann problèm l’apré ral anou an aryèr. Problèm shomaj ! Problèm la vi shèr ! Problèm lojman ! Problèm l’ilétrism ! Problèm kann ! Problèm rokin ! Problèm nout l’inivèrsité !.. La poin okinn dann bann problèm la, la fine rézoud. Moi d’aout kan lo prézidan la vni bate in karé, li l’amenn avèk li son ram kominikan, pou fé prann anou noir pou blan, makaroni pou la bouji. Son gob lo marsh in pé, dann tan-la, mé zordi son l’éfé la fine fané.

Astèr li di dann tout péi l’outre-mèr i fo in plan ékonomik partikilyé pou shakinn, é sé bann moun lo péi k’i doi trouv lo plan. La Frans va solman apiy lo rin ! Konm di lo kont i fo pa kont dsi baton tonton po travèrs la rivyèr. Donk, bann péi l’outre mèr i fo zot i débarbote azot par zot mèm. Kosa sa i rapèl anou ? Sa i rapèl anou finn l’ané 2009.

Sarkozy l’été fine fé son z’éta zénéro épi li la fé in gran diskour pou dir kosa li rotien pou l’outre mèr. L’été pa bète son plan-vi k’bann z’opozan konm Paul Vergès la trouv l’été tan in prézidan i di dé shoz konmsa, mé kant a bann sosyalis, zot l’avé pa trouv lo komansman di débu d’in solisyon pou mète dan lo plan – ékan zot la gingn lo majorité, zot la fé lo vif pou obli la réfléksyon bann moun l’outre-mèr. Dizon, té i pé shanj in pé lé shoz, arzouté, sansa artiré ; mé l’até pa in rézon pou mète lo réfléksyon dann la poubèl.

Astèr si mi konpran bien i sa domann anou krèz nout koko pou trouv solisyon, aprésa l’afèr lé riskab fini an lo d’boudin pars la fin lo mandatir sar près fini arivé.. Donk, si mi konpran bien, i arfé anou astèr lo mèm kou ké 2009. Ziska lo proshin tour. In pé d’réspé pou nou kant mèm !