Somèn isi, Rényon Promyèr la roganiz in l’émisyon dsi l’anploi. In késtyon inportan. I mérit ali in l’émisyon dann télé. Pèrsone i sar pa di lo kontrèr, vi la sityasionn l’anploi koméla La Rényon. In l’émisyon k’i shanj ar pa gran shoz, fransh vérité, mé solman èl té pa prévi pou shanj lé shoz. In l’émisyon, sa i inform, é sa i pé donn bann téléspéktatèr inn-dé shomin pou alé pli loin. 

Moin pèrsonèl, moin la rogard in pé épi moin l’arèt rogardé pars in sèl késtyon té apré jigil amoin. Lakèl ? Ala èl la : sé kèl problèm lo problèm de fon pou nout péi ? Si lé shoz i rès konm i lé, si i ofèr pa plis travay demoun, in bonpé plis travay demoun... l’èr-la, arvoir Pyèr, tak baro ! Ousa i sava trouv bann z’anploi-la ? Pou moin, na ariyenk lo dévlopman lo péi i pé donn Kréol plis travay.

Donk, la késtyon : lo dévlopman La Rényon lé posib, lé pa posib ? Si lé posib, moin lé sir va ranvèrs la kourb shomaj. Si lé pa posib, lo nonm shomèr va goumanté, pa ziska l’infini, mé in bonpé plis ankor. Si lo tourism lé kapab amèn vré touris, si l’otosifizans alimantèr la pa in plézantri, si l’otonomi énèrzétik nou na moiyin trapé, si nout péi lé kapab dévlop son séktèr prodiktif... l’èr-la lé shoz i pé shanjé, é vit, solon moin. Si nout l’okipasyon sé donn travay Rényoné, dan tout séktèr, mi pans la nana moiyin moiyéné. Si nout projé dé gran sèrvis lé pa poniardé galman.

Moin la pa antann dé shoz sinp konm sa dan lo déba, é si moin l’avé antann sa, mi pans moin nora pa pèrd mon tan. Ariyenk si moin l’avé antann nout dévlopman lé posib trapé.

 Justin