Oté

Si moin téi pé trouv in solisyon majigador pou diminyé mon zordir an poi é an volime

Justin / 4 zanvié 2018

JPEG - 43.6 ko

Mi koné pa si tazantan, konm moin, zot i trouv z’ot poubèl lé tro lour kisoi pou fé roulé, sansa bann sasé pou porté. Oplis mon laz i avans, oplis i ariv amoin d’an avoir in l’inprésyon konmsa. Ankor, moin lé dann in komine i lèv poubèl gri dë foi par somenn alor épi poubèl jone in foi dann dë somenn. Parl pi si moin té i rès dann in komine i lèv poubèl in foi par somenn.

L’èrla, mi mète a rèv in solisyon majigador pou diminyé lo poi bann poubèl. Pou komansé, mi di si moin téi fé in bon triyaz sa nora pétète pi sov amoin in pé. Donk mi komans triyé é ala in promyé traka : boutèye do luil vid sa na son poi épi son volime, brik dolé galman nana son poi épi son volime, l’anbalaz tout kalité produi sa i pran la plas galman… Ala mi rogard dési l’internet épi mi trouv in réstoratèr i bate rokor : dann in l’ané, li dépoz solman 30 kilo zordir ; Mi koné p koman li f é, mé pou fé mirak moin lé sir li fé mirak.

Konm moin la pa tro gingn ni lo poi, ni la plas, ni volime mi domann mésyé l’internet si li pé donn amoin in bon téknik. Boug la i koné tout, mi di azot. Ala ké li di amoin pou déshé lamanjé li nana in bon solisyon : mète dé troi poul dann in park épi donn azot réstann ri, réstann grin, réstan sald, réstan légime. I paré sa dé in n’afèr vanté : près tout réstan manzé ou i rédui sa azéro ; sansa près zéro.

Solman pou moin lo kou la manké pars mon madam i vé pa mimète poul dan la kour : poul i manz son flèr é son flèr sa lé si èlman présyé pou èl, la pad si térin la, mi doi port lo konba pars fouti é moins é lo mèm. Si tèlman mi sava oir mésyé internet pars moin lé sir li nana bon bon solisyon. Mi antrovoi bann solisyon i fo pou moin, mé mi pans pa si la sosyété kd’konsomasyon li viz mèm bi ké moin.

Donk mi form in vé pou l’ané 2018 é so vé la sé : si ou plé sak i pé, donn amoin in tiktak pou ariv trap lo rézilta moin la mark an o la. Si mon bann dalon néna in solisyon majigador si zot nana in tan avèk moin ébin ède a moin trap in bi si inportan dann mon vi an tou lé ka mon l’obzéktif pou l’ané 2018.