Médame, Méssyé, la sosyété, koze èk mwin sé koze èk in kouyon, mé sé o pyé d’lo mir k’i oi lo bon masson. Mézami, zot i koné dan la vi noute toute néna ladvèrsèr-mi sava pa di z’ènmi pars zènmi i fo lèss sa pou la guèr. Dann la vi, dann lé zafèr, dann la politik, la plipar d’tan n ou lé konte de moun é demoun lé konte nou : sa i vé dir ou néna poin lo mèm zintéré ké l’moun é l’moune na poin lo mèm in téré ké ou. Kissa k’i gingn an finnkonte ? Ala lo fin fon d’lafèr. Toute fasson, out l’advèrsèr i guète bien sak wi fé, é ou wi guète bien sak li fé. Sé la ké nout kozman i rante an zé : si ladvèrsèr lé pa kontan, sé in sign, si li lé kontan sé in n’ote sign. Si li bate la min, kalkil aou bien : pé s’fèr ou la fé in l’érère, pé s’fèr sé li. In l’érèr dann l’analiz, dann la stratézi, dann la taktik sa i pé ariv toulmoun, oute ladvèrsèr konm ou mèm. Si li bate la min pou an narg aou, wi pé dir ali : sé an dèrnyé k’i oi sa, sak va ri pou d’bon sé sak v’ariv an dèrnyé. Astèr si sé ou k’la tronpé, rétropédalaz siouplé. Alé ! mi kite azot rofléshi la dsi é ni artrouv pli d’van. Sipétadyé.