Moin la pa koni mon granpèr, mé d’apré sak moin la antann, li téi travay kolonaz déssi la tèr in blan... Mon papa té dézièm li, alors son gramoun té déza in pé rézonab kan li té pti marmay... Zot i koné, dann tan-la, i paré demoun té vié bonèr. Bonèr zot lavé pi la fors pou amène le soso konm k’i fo pou la famiy : alors in bon pé , troi kar d’tan, té i fé ménaz avèk la faim.
Le gro manzé lété mayi : sa lé bon, i done la fors, mé tazantan mayi la poin an sifizans, épi i fo gard pou la somans. Alors, téi manz lamsime... Épi kan la pi lamsime ?
Mon papa téi rakont, son momon téi anvoy ali la kaz son ma-tante, akoz son tonton lavé plis moiyin épi té i akèy ali bien, san roprosh, mèm san près kozé zis inn-dé mo pou fé konpliman, épi lèr manzé, lavé touzour in pla pou kontant ali, pou arnouvèl in pé la fors èk lénèrzi.
Kan mi oi dann télé, demoun déor, l’apré soufèr la faim, i pass lo tan pou atann in konvoi l’imanitèr k’i arv ar ptèt pa. Kan mi oi bann marmay, lo vant baloné, plin èk lo vide, mi di dann mon kèr : kèl koté banna va trouv la kaz in tonton, sinonsa in matante pou gingn in boushé manzé. Pou fé arète la tète tourné, lo vant grouyé, pou pi oir vizion. Ségnèr bondié ! Si na poin mayi, kansréti o moins in pé lamsime pou tir azot dann malizé !

Justin