Avanyèr banna la rorganiz in lasanblé plénièr la rézyon pou koz si la kontinité, sirtou la kontinité èk la frans, soré in bon nafèr pétèt si té ryink pou sa, si té séryé, si té pa konm in pié d’bwa po kash tout ? Mwin na doutans la d’si. I prétan navé d’moun, mé kan i sazi pou vwayazé, pou bat karé, kont dési. Té plin i di, kiswa zéli, kiswa shèf lantropriz, party politik, ou bann zasosiasyon, bann patron lavyon osi, shakinn la mèt son grin. In pé lé v’ni pou gonf zot pla osi, koshon lé gra, i fo tié, shakinn i vé son morso, shakinn i tir profi. Laddan néna pou bwar é pou manzé, plis pou manzé sanm pou mwin. Pou mon par, mi di, éské zordi sé sa lo pli irzan pou kozé, na pwin dot ? Dan lo déba yèr, in késtyon té rovwyin souvan, kisa na drwa kontinié ? Maléré, sak néna, békèr d’klé, gro zabo, sak lé isi, sak lé déor ? Nout tout ?

Mi di, in pé lé san rézon solman. Koman zordi, dann in tan la séshrèss konm ni koné, la kriz i doz partou, larzan i fé défo, lé kourt pou nout tout, bann kominn i an souplyingn, koléktivité lé o bout, léta i fèrm lo robiné, in pé i fé konm si larzan i grinn konm la tay kabri ? Mi koné d’moun konm sa, i di nou na pwin larzan, i manz o pié toultan. Kan mi di a zot sé in bann san konprénir. Mi diskonvyin pa i fo èd bann moun a tèr, fo èt solidèr èk zot, mé kandminm. Dapré zot kisa i sar pèy sa ? Mi domand a mwin si zot mèm zot i krwa ! Konm di lo kont, banna soré pa plito pou prépar kékshoz an kashièt, na pwin zéléksyon tanto i vwin ?

A voui dan bann moun té la, lavé osi sosialis, ala in ot bann komik ankor, ryink zordi zot i ran a zot kont, zot gro lérèr an 2010, kan ou na gro kèr ? Zot la mèt lo prézidan la rézyon an plass. Voui sé zot, pa bozwin gnoré, é bin zordi gout, zot lé konm kanar la koup la tèt, i fé zig-zag, i kour partou. Zordi néna oiti-oitia rant zot. In pé i fé ri, i di, banna pou pèrd la tèt, la poz in lamandman lasanblé, inn té pa la pou défann. Ola lo vié ou lavé rézon, fo zamé apwi si bwa d’fig tansyon tonbé, anddan lé kré. Pou la kontinité ? kontinié sobat ant zot, amwin mi inkièt pi pou sa. konm i tourn lo fim, mwin lé prèské sir, si na pwin larzan va fé in shèk !