Mé oila mon késtyon sé sète-la : kisa lété néglijan ? Kisa lété lo pli néglijan ?
Mézami, i fé in bonpé d’somenn demoun in pé sansé, in pé rézonab, dizon in pé pridan la tir lo signal d’alarm. La di konmsa si I debark in kantité d’moun I sort dann péi kontalminé, néna in zour ni gingn ar pi anpar la maladi. Dousman, ti Dousman, la fé sink sis malad an plis, épi la komans fé in pé plis in dizène, ziska fé katrovin, katrovindis é va fé plis si i kontinyé.

Tout fason na pi arien pou anbar la maladi ! Virus i déplas ali konmsi li lété shé li ! I komans aoir bann mor, épi bann moun an réanimasyon. L’èrla i komans amontr lo doi in pé pou di sé zot fote…I amontr pa lo doi lo préfé, ni l’Ars, ni bann sèrvis ofisyèl mé lo bann moun la fé in fyèsta kékpar : i apèl sa bann cluster. I paré noré pi apèl sa foiyé kontaminasyon, mé kluster sansa foiyé kontaminasyon sa I shanj pa arien. Sé topète morète !

Sèryèzman, d’apré zot, nou kréol n i koné koman ni lé : nou lé pa pli néglizan ké lé zot. Konm toulmoun n i konpran pa kosa i ariv é ni pans gouvèrnman l’apré foute anou in pat koshon. La fine fé in foi sa néna kékmoi, akoz pa in dézyèm kou… An nou mèm ni pans bann moun la ote l’apré fé la fète nou mèm pti kolon ni di dann nout kèr : akoz pa nou pouf é la fyèsta ? Akoz lé zot ? Akoz i fèrm pa l’aéropor Zilo.

Alor, an parlann néglizans, lo bann promyé néglizan sé sak la mète anou dann in sityasion konm sak ni koné. Kisa lo promyé résponsab : sé gouvèrnman épi son bann sèrvitèr sir plas… Lo minis néna rézon anparl néglizans, mé an promyé li na ka rogard son figir ali é sète son bann kolaboratèr dann in glas épi la va oir si banna é li-mèm la poi in sèryé tèe do néglijan.