Mézami, pou fère vite, ni pé dir koméla la baz nout manjé tradisyonèl sé dori. Dann tan lontan lété pa parèye san pour san : in tan demoun téi manz mayi, sansa mayi-dori mélanzé. mé antansyon, si ni rogarde bien kossa ni manz pou vréman, ni apèrsoi ni manz dori in porté, mé ni manz ossi dopin é si lo linportasyon d’ri i trap par-la 45000 tone, linportasyon la farine do blé i trap 13000 tone i ansèrv pou fabrik dopin é d’ot zafèr ankor, mé dopin an mazorité.

Somenn passé in l’assosyasyon la fé in rékolt dori : zoli ri d’apré sak mwin la vi dann télé avèk gayar-gayar zépi. In komansman, konm plizyèr pèrsone épi plizyèr z’assosyasyon zot ossi dopi bon koup dé tan. Mwin la fine anparl azot in méssyé Bègue par koté d’ Sinte Anne l’avé fé in projé pou ankouraj bann plantèr kann pou zote i plante dori. Mi panss nout shomin sar long pou fé in prodiksyon d’ri konsékan mé pou arivé nou va arivé, si néna in volonté dann lo péi.

Sa i vé pa dir mi ankouraz azot pi manz dopin pars dopin la fine trouv son plass dann manzé bann rényoné, mé pou l’instan li dévir lo do avèk l’otonomi alimantèr… In ga mi koné la di amwin ni pé plante lo blé nou ossi. Akoz pa ! Mé ni pé mélanz la farine doblé avèlk la farine sorgho konm i fé laba dann Burkina Fasso. Mé akoz pa mélanz la farine avèk nout band rasine ? Mwin la vi dannn télé, dë boulanzé, in madam, avèk in méssyé, i mélanz manioc avèk la farine ziska 15 % a popré.

Mi panss sa sé in bone idé, é lo tan k’i kour léspri kréol i travaye dir é lo lidé d’lotonomi alimantèr i fé son shomin. Anpliss ké sa, lidé d’in lotonomi alimantèr prop, bio, li ossi li fé shomin. Pti pa pti pa n’arivé.