Toussa dann méyèr dé ka pars dann pir dé ka, ni pé pèrde noute anvi épi noute kouraz. Lé possib ni larg toute an route é noute prozé inportan i fini par foiré é litrouv son plass dann la galri bann katédral kassé.

La plipar d’tan kan sa i ariv sé pars nou la bite dsi in konzoin osinonsa in konzointe, in dalon-dalone i oi pa lé shoz konm nou é sa lé pa rar konm zot i koné… biensir sa la pa inn késtyon bonté ni inn késtyon d’méshansté. La plipar d’moune lé bon, moiyènman solidèr, avèk son bon koté épi son mové koté… L’èr-la mi anparl bann problèm rante partikilyé, mé i ni arzoute an pliss bann konsission ékonomik, sossyal, politik ni konpran bien sa sé in faktèr d’risk ni gingn pa fé arien pou lite kont sa.

Na poin lontan mwi la trouv in paran la kite La Franss pou vni La Rényon. Par shanss in famiye la kaziman donn a li toute sak i fo pou réissi : in propriyété an pli randman, in kaz dsi son tète, delo épi in pé park zanimo é toussa san fé… Mé an dé-tan troi mouvman li la fini par éshoué.

Mé oila li la pa gingn lindépandanss li té i souète gran kèr. Li la pa gingn shoizi sak li téi vé fé, konm li téi vé fé, mèm lo droi éshoué banna la rofiz ali. Ala li rokomanss son parkour mé li apèrsoi li pèrde la moityé d’son tan avèk plizanpliss lanvi borde toussa-la. Arzoute èk sa lo tan abandone sa l’arivé poitan dizon sa lété son shanss dan la vi…

A bon antandèr, salu !

Justin