Mi pans zot i rapèl in fab La fontaine.Téi nonm :lo shate, la bélète épi lo pti lapin. Mi pans si zot la gingn la shans an avoir in bon amontrèr kan zot lété lékol sète-la la sirman di azot bann fab La fontaine sa i lans in pé bann mésaz kodé pou la sosyété.

Pou arvni in pé dsi la fab, l’avé in foi in pti lapin téi apèl Jano, li l’avé fé son tèryé in bon l’androi mé kan li la parti pou rode son soso La bélète la rant dann son téryé épi téi vé pi sorti .Mèm Jano lavé bo dir ali : « Tèryé-la lé amoin, téryé la lé amoin ! ». Bélète té i di solman li sort pa, pars la tèr i aprtien promyé moun la rèss dodan.

Final de kont lé dé kontèstèr la parti dovan la zistis.Lo ziz lété in bèl shat i apèl Raminagrobis, é li la bien vouli ékout tou lé dé, mé kan zot la vni pli pré d’li, li la souk lé dé li la manz azot san pran la pène fé in prosé.. zot i koné dann in fab néna in moral sète-la i di konmsa : Sa i arsanm bien lo ka bann pti roi kan ozot i domann rapèl bann gran.

Pou nou zordi, ni adress bann milyardèr, bann gran lobi, bann gro kapitalis sak lé propriyétèr la moityé la tèr pou domann azot tir la mizèr dann la sosyété.Ni mète azot prézidan é kan ni adrèss azot pou trouv in solisyon nout problèm zot i réponn anou konm bann prézidan i réponn zordi :kan i gingn pa, i gingn pa ! Kan lé pa posib , lé pa posib ! é konm di l’ot si nou lé pa kontan zot i anvoye anou pran konstan.

Justin