Na in somenn konmsa moin la lir dann in zournal l’il moris, k’in jenn médsin morisien (DR Kessen Paten) la fé in gran dékouvèrt : li la trouv lo « jène » k’i provok la skolyoz. Zot i koné kosa sa i lé ? Sa sé in maladi k’i fé kas kontour pa konm k’i fo la kolone vèrtébral. Doulèr ou i gingn avèk sa ! Mèm avèk lo tan ou i vien valid – invalid si zot i vé. Moin lé plin l’admirasyon pou médsin-la..

Plin l’admirasyon mé zalou galman pou nout pèp rényoné. Moin nana konm l’inprésyon d’ot pèp a komansé par bann morisien apré koup dovan nou pou la roshèrch syantifik. Pou kosa ? Zot lé kapab mé nou osi nou lé kapab ! Anpliské sa nou nana in l’inivèrsité dopi lontan é nou na lo moiyin pou moiyéné avèk lo bidzé ké li nana. Malgré sa mi pans lo rézilta lé pa bien la pou nou ! Amoins ké nou néna tro l’arzan la sir-réminérasyon ?

I fo dir Maurice lé indépandan é li na lo pouvoir pou prann lo bone désizyon k’i fo é nou nou lé anmaré, nou lé anklavé… Poitan avèk nout bann lisé nou nana, avèk lo bidjé nout roshèrch, avèk l’arzan bann biznès-moun nana isi é i pé ésponsore bann jenn, mi pans ni pouré an avoir dis foi, vin foi, san foi plis shèrchèr ké nou nana lo zyé braké si sak i pé rann sèrvis l’imanité é ramenn isi lo doviz pou dévlop lo péi.

Si nou néna lo moiyin pou désid par nou mèm !