Oté

Si nou té i anparl in pé Roland Garros

Justin / 13 zwin 2018

JPEG - 43.6 ko

Zot i koné shak l’ané, dann l’éstad Roland Garros-laba dan La frans-, i fé in gran tournoi tennis, é sa lé bien répité, é sak i gingn tournoi-la bann ésportif i tir shapo pou li. In zour zot i rapèl sé Yannick Noah la gagné. Sète ané i paré Rafaèl Nadal la gingn pou lo onzyèm foi : in vré rokor. Mé ni sava pa koz si ténnis é la pa pou sa mi fé mon modékri zordi la dsi.

Pou kosa alors ? Pars mi sort oir dsi FaceBook, kan tournoi i komans néna in prézantasyon n lo tournoi é défoi i koz dsi Roland Garros. Mé koman i fé in kozman la dsi si Roland Garros la pa in zouar d’ténnis. Pars i paré sé in moun li téi koné bien la dmann donn éstad la son nom dann l’ané 1919. Tan-la Garros té mor, pars son l’aviyon la pran lo fon dann in konba kont bann l’aviyon zalman, l’ané 1918.

Désèrtin la di té i falé parl gran mésyé-la, é sirtou pa obliy di dé mo dsi La Rényon pars li lé éné dann Sin-Dni. Moin pèrsonèl, mi koné pa si i dové anparl dé li konm in natif La Rényon. Sak moin lé sir sé ké isi La Rényon i fodré fé plis in kont avèk konm avèk tout bann moun inportan lé né La Rényon.

Mi pans néna dé shoz a dir dsi in moun konmsa konm pilote l’aviyon, konm promyé moun la travèrs la mèr méditérané dann in l’aviyon, konm in gran sportif, konm lo promyé moun la invant in sistèm pou tir avèk mitrayèz an travèr lélis l’aviyon, konm solda prizonéyé dann l’almagn épi évadé. I pé parl dé li ankor konm ékrivin, – li la ékri son mémir épi d’ot shoz ankor. Néna ankor i paké rézon anparl dé li.

Biensir dann ti plas moin néna dann zournal mi sava pa fé in gran tartine la dsi mé sak i vé rode dési l’internet li pé trouv dé shoz. Mé in n’afèr moin lé sir, si nou mèm ni mète pa bann rényoné épi La Rényon anlèr, i fo pa kont dsi lé zot. Kont pa dsi baton tonton pou travèrs la rivièr.