Oté

Si nou té i parl ankor in kou dsi la késtyonn létshi !

Justin / 27 novanm 2017

JPEG - 43.6 ko

Pou kosa ni sava ankor anparl de sa ? Somanké létchi lé mor sa pou nou ? Sansa létshi va aport anou sibvansyon épi nou va kontant anou dsa ? Afèr mi di ankor dé shoz konmsa ? Par provokasyon, par mank de konésans, sansa opars mi èmré dann séktèr la nana la pagaye konm dan lé zot.

Fransh vérité, kansa i apèrsoi létshi lé an kriz ? Moi d’oktob, zis kék somennn avan la rouvèrtir d’sézon. Sak konm moin la viv dan la kanpagn, i koné pyé létshi i donn anou l’informasyon pou dir anou si la sézon lé bon, sansa a popré bon, sansa ankor mové vèy pa koman. Mi souvien pti marmaye, nou té i sava rogard bann pyé, bann flèr, bann grap pou konète si la sézon sar bon. Nou té i oi mèm bann bazardyé apré ashète lo pyé : kisoi inn, kisoi dé, kisoi mèm in vérzé konplé avan k’lo pti létshi la bien noué.

Sé dir si pou d’moun konm moin, tout z’afèr lété san difikilté pou moin. Moin lété bien loinn dovine si la kriz lété la dovan nou. Lé vré, moin lérté fine romark ané apré ané, la sézon téi tard in pé plis : in tan, moi de novanm la sézon té fine rouvèr, apré la pass kinz novanm, lété mèm pa loin trap komansman lo moi d’désanm… Lé vré nou l’avé bien vi si i taye pal o pyé, la sézon lété pa si bon ké sa, mé pou lo rès dovine dovinaye nou téi dovine pa.

Konm mi di kouyon avèk konépa, i komans par k, donk lé pa amoin d’trouv in répons. Kisa k’i doi trouvé alor ? La roshèrch. Oui mé la roshèrch si èl i rode pou trouvé é pa pou loupé dakor, mé sanm pou moin la pa rode inn tyork sète ané. La pa trouv inn tyork non pli ! Alor, mi pé koz la boush rouvèr, vi ké bann z’om de syans zot mèm i anons pa nou in nouvèl korèk.. La syans, sa sé in n’afèr i travaye a suiv sa ! Pou kosa la paf é in rolvé tout bann paramète dopila Rényon lé départman.

Si i atann zordi, va pran ankor sinkantan pou avans in bon l’ésplikasyon, pou pétète mark batu dsi nout prodiksyon é si sé pou sa mi oi pa tro kouk i ansèrv.

NB Astèr i di napoin in zékar d’tanpératir konm k’i fo. Vré ? Pa vré ? Mi koné pa mé pétète kan bann tète zèf va komans shofé, l’èrla nou va avans dann la konésans. Pétète oui, pétète non, an touléka moin noré bien émé n pé té i fé pa tro aspèr anou konmsa.