La pa toussala, mé mi vé anparl in n’ote afèr avèk zot. Mi vé anparl azot in lémission mwin la suiv boutanboute dsi télé Maurice. Sé in konkour bann kolèj- kolèz laba, avèk kolèz issi la pa lo mèm zafèr pars bann jenn lété plito gran é lo konkour i fé par ékipe-in lékip troi jenn par tablisman pou diskite dsi in sizé shoizi par avanss.

So foi issi lo sizé lété lo réshofman klimatik épi la lite konte lo réshofman. Shak ékip i shoizi in pozission épi i défann sa ziska ké lo dé zékip i mète dakor dsi in pozission komune… Konm l’avé plizyèr tablisman nèf si mi tronpe pa lo sobatkoz la dir in bonpé é mwin pèrsonèl mi panss sa lété in bon manyèr pou diskite dan la lang la majorité d’moune i koz- lo kréol morissien.

Troizyèm ané d’ran i fé sa dann télé Maurice é mi panss firamézir nora pliss konpétitèr pars par l’fète néna in préssion pou dévlope sak banna i apèl lo morissyanism. Biensir bann zinstitissyon i mèl dann ta-mi panss mèm sa i pé intérèss l’unesco épi bann morissien zot mèm pou dévlope zot lang nassyonal épi son litilizassion.

O fète, banna laba i konsidèr lanploi la lang matèrnèl sé in lanrishisman é pa in lapovrisman konm in tan bann zotorité téi panss issi La Rényon. Domaz issi la pankor pran konssyans lanrishisman-la. Kan nou va bien konprann toussala mi panss sar in gran pa an avan pou nou.

A bon antandèr salu !

NB. In linformassion avan mi take baro mon modékri.Laba dann Moris banna la fé galman in konkour lélokanss é so foi issi dann la lang Bhodjpouri, in lang indyène, in minorité d’moune i koz laba-par la sink pour san d’moune- alé ni artrouv pli dvan.