Mézami, zot i koné kossa i lé in goni zot, Mi panss ké oui, mé marmaye i lèv i koné pa kossa k’sé sa. Mi di azot sa pars samdi mwin la parti in zoiné patrimoine é l’amontrèr la anparl goni.In pti marmaye té la épi li la di : « Inn késtyon ! kossa i lé goni silvouplé ? ». ..
Zot va dir amwin sa i fé pa arien si marmaye i koné pa pars zot nora touzour lokazyon konète, é mèm si zot i koné pa,sa i kass arpa lo kate pate in kanar. Mi kroi pa sa pou mon par.Pou kossa ?Pars i vo myé in sak an goni –toile do jute-plito k’in sak an plastik. In goni la zamé gaspiye la natir, plastik oui. Sé pou sa sak lé anssien, firamézir li rovien an vogue é la pa mwin pou argrété. .
A ! Goni dann tan sa lété k’i fé parti noute mond anou. Nou té abityé avèk sa é téi ansèrv anou souvan dé foi : pou porte do ri sansa mayi.Té i fé payass avèk sa :in pé la paye mayi dodan, mèm in pé la mousse é lé bon pou nou pass la nuite-lé bon pou nou ral noute karang. In l’invitassion : vien arzoinde amwin dann mon goni . In ranplasman d’kapuchon kont la plui : mi aranze in bon saou avèk mon goni pou protèze amwin konte la plui .
In shanté :ayayay koute amwin zot toute, goni vide i tienbo pa d’boute