Oté

Si nou téi anparl in pé lo kode noir/dézyèm morso

Justin / 22 désanm 2017

JPEG - 43.6 ko

Nout késtyon yèr lété : lo zésklav té in pèrsone té pa in pèrsone.

D’apré sak ni oi sé in pèrsone, mé son droi lé dimminyé par rapor in pèrsone lib. Nou la vi pou li maryé i fo lo mètr i done son z’akor, pa son paran. Zanfan zésklav i tonm zésklav son tour. Si lo papa lé lib é lo momon zésklav, lo zanfan sar zésklav... Lii pé port plint dovan la loi, mé lo tribinal i fé pa tro in kont avèk son témoignaz pars i éstime li lé pa fyab.

Lo mètr i pé pini son zésklav : li pé fé fouète lo zésklav, la plipar d’tan dann in l’atlyé prévi pou sa. Mé nana d’ot pinisyon pli sévèr é sé tribinal i kondane : par égzanp koup lo jaré si lo zésklav la parti maron, koup lo bra si lo zésklav la volé, kondane a mor si lo zésklav la lèv la min dsi lo mètr sansa dsi la métrèss.

Pou réponn nout késtyon, ni pé oir galman si lo zésklav i pé z’ète propriyétèr bann zanimo, bann frui, bann légime. Antansyon si i trouv in zésklav avèk bann produi konmsa, si li la poin in modékri par son mètr, i pé konsidèr li la vol lo marshandiz é li gingn an plis bann pinisyon nou la mark an o la.

Pou lo bann pinisyon in pé i di, lo mètr téi pini pa pars la valèr lo zésklav i diminyé. Solman bann a la prévi in l’asirans pou fé ranbours lo zésklav mor par lo kou li la gagné... Si bann boubou lé an sirfas lo mètr téi fé pass in spès longan fé avèk piman, luil épi zinzanm. Epi téi done tizane pou abate in pé la fyèv.

Nb Nana inn dé trikèr nout l’istoir i di, pou zot, la sityasyon in zésklav lété pa pli pir ké sète in doméstik laba dann l’érop. Biensir lé fo, é tout fason lo trètman lété kriyèl in poin sé tou é i fo pa pans lo sor bann zésklav lété tout an dousèr, par lo bienfé lo patèrnalism.

La pankor fini