Mi diré sinploman, pou mwin, pèrsonèlman, la plass vin-mil zésklav la danssé in sèrtin 20 déssanm 1848 i mérite myé ké sak li lé zordi é si i vé tienbo konte la sélébrassion mi vien anparlé-i fo kante mèm pa ni obliye zour-la pliss la moityé noute pèp rényoné la rékipère (mèm si lé pa a san pour san) son libèrté é ni pé pa fé – si ni fé kékshoz- in lopérassyon an missouk, mi fig mi rézin. Nou lé dann l’obligassion fé in gran lopérassion assé pou réspèkt lo gran zourné nout pèp rényoné.

Astèr si ni lèss léstatu Mahé de labourdonnais dsu plass-la é si konm mi kroi i aménaz la plass pou rapèl anou la grande zourné 1848, ni doi di, fransh vérité, lo gran pèrsonaz ni vienn anparlé na pi son plass landroi li lé zordi ankor é dopi 1856. Mi panss pa sré just lèss dann lo mèm landroi lo bouro, pou annarg ankor in kou son bande viktime. Konmsi nou téi vé k’i konte ankor in kou lo nonb la min droite néna dann bèrtèl bande shassèr noir parti maron épi si sa i koréspon bien larzan la dépanssé..

Inn foi mwin la di sa, astèr Mahé de Labourdonnais par son léstatu, néna son plass issi la Rényon, pa si tan tèlman pou nou rényoné, mé pou lo rol-mal konpri- li la zoué dann listoir inpèryalist la franss dann loséan indien é sirtou dann son bande konba dsu la mèr konte l’Anglétèr... Aprésa i pé touzour diskité si li té in gran ladministratèr -i pé fé son bilan- antouléka i pé pa diskite dsi son jéni militèr d’apré mwin..

Lèss son léstatu issi la Rényon é si i anparl de li, alon anparl sèryèzman. Alon anparl sèryèzman son rol umin (osinonsa inumin) issi dann loséan indien. Alon anparl sèryèzman noute listoir épi listoir la franss épi sète lé z’ot puissans-an évitan si lé possib bande zidé dominante, é i panss néna dé ta édé ta k’i polyé la konéssanss noute listoir

Konm zot i oi, mi voulé pa tro anparlé, émwin la anparlé é sirman mwin nora ankor lokazyon anparlé.

A bon antandèr,salu.