Mi rapèl in marmaye l’avé di amwin in zour si pou zanfan konm li lété pa possib mète la mizèr orlaloi, é fèr an sorte ké lé pa prévi dann lo péi, bande zanfan i konète la mizèr. Mé mwin la domande ali, pou li, kossa i lé in zanfan pov. Pars mi di ali, dann tan mwin lété marmaye, mi rapèl bien la plipar bann zanfan té pov, mèm mizèr.

Mi rapèl sa par déssèrtin détaye :

Par ébzanpe, mi rapèl, kan mwin téi sava katéshiss Sinte Klotide, néna dé marmaye téi tonb fèb dan la mèss alé oir d’ote i diré zot téi soufèr pa de riyin.

Kan mwin lété lékol, mi rapèl kan bande marmaye téi tonb fèb, la métrèss téi anvoye azot dann la kuizine pou boir in pé lo d’sèl épi noute vyé kuizinyèz, madam Baba téi done lo marmaye in boushé d’ri — défoi sèk, défoi avèk in pé la soss kari.

Mi rapèl ankor zordi marmaye l’avé a pène pou mète dsi zot in linz lété pa prézantab.

Konbienn marmite vide kapoté mwin la vi dann tan kan mwin té i sar vizite demoune avèk mon papa sinploman pou li mète azot pikir. Mwin téi koné déza, mon papa téi sava dsi l’tar aporte inn-dé pinte mayi, avèk lo grin - La n’ote biensir, mé d’apré mwin nou l’avé bonpé demoune l’avé poin.

Mon papa téi rakonte amwin étan pti, l’avé lé zour téi manz mayi mouli, d’ote téi manz lanmsime, manyok sèl — la grèss… é l’avé dé zour mon gran-mèr téi anvoye papa shé tonton Raoul pou manz in ropa. Apré kan li téi rotourn son kaz, matante téi kashyète de troi zafèr dann in tante konmsa papa mon papa épi momon mon momon téi rèst pa vante vide.

Sa lété dann tan kan gouvèrnman franssé téi rofiz anou l’égalité bande prèstassion… Mé koméla ? avèk la vi shère, avèk larzan k’i manke, néna dé zanfan i dor ankor vante domi-vide é mi domande koman arète in léskandal konmsa, koman désside mète orlaloi la mizèr… Oui mé néna in koupab é kèl koupab i doizète kondané mé mi jur azot mèm si mi panss la mizèr i doizète mi orlaloi. Bin alor kissa l’otèr, kissa i doizète kondané ? Mé mi sava kalkil sa bien.

A bon antandèr, salu !