A ! lé vré, lé bien komode kan delo i ariv dann robiné, kan ni pran la doush é ké ni pé lav anou pou vréman mé nou lé tèl-man abityé avèk so lo la, ké nou san anou fristré par in lo k’i koul pa toultan, ké lé pa a nout dispozission kan nou la bézoin ali, é k’an pliss de sa, néna in bann konpagni k’i éskiz azot poliman mé k’i priv anou d’lo, k’i réspèk pa l’èr pou rouvèr d’lo, é an pliss ké sa k’i panss k’i pé fé anou la losson an trétan anou d’gaspiyèr.

Kan i di anou sa, touziss si ni pète pa in kab é nou lé pa loin akab bann konpagni pou zot prop résponsabilité dann sète afèr d’lo. Kissa i fé k’lo tyèr d’lo i i pèrde avan k’i ariv lo robiné ? La pa nou. Kissa i fé ké laba sint-roz dolo douss i pèrde an milyon d’mète kib a koté d’lo pti por, La pa nou. Kissa i fé koul in takon d’lo la plui dsi lo blaké kan la plui i tonm é sa i fish dirékssion la mèr ? La pa nou final de kont.

Mi rapèl étan pti souvan défoi kan la plui téi tonm pa, nou l’avé poin d’lo dann nout kaz, delo téi ariv in fontène dolo é té i fo fé la ké, li anparl pa zot. Défoi dann nout vilaz téi fé in névène é la popilassion téi grène la priyèr partou dann shomin é dolo téi fini par koulé — in zour — mé nout passyanss lété a boute ! l !.. Lé pa loin oir bann travayèr apré mézir la profondèr la nap fréatik é apré dir anou, tanssion pangar i tarde pa vaa mank anou delo..

Mi arète tèr-la pou linstan, mé mi san sète ané mi sar kriye dann zoinal pars si delo sé la vi ébin kan na poin delo na poin la vi konm k ‘i fo. A bon antandèr salu !

Justin