Dézyèm késtyon : dann kèl lang wi pé z’ète élokan ? Mi diré, dann toute lang wi pé z’ète élokan. Wi pé ète dann oute lang de néssans konm dann toute lang ou la anprété, wi gingn bien kozé, é wi ariv rézilta nou la marke an-o la. Kan ou la fine kozé demoune i panss lé sir ou néna rézon.

Dann kèl ka wi pé z’ète élokan ? Dann la politik par ébzanp, pou prononss léloj in défin, pou sélèb in gran pèrsonaz. Antouléka, demoune i ékoute aou bien kan ou lé élokan, normalman, wi pé soulèv le moune apré ékoute aou… Mwin pèrsonèl, mi panss ou lé zamé pli élokanké ké kan wi parl lo mérite in bon kamarade la fine pass l’ote koté la vi.

Kissa lé élokan ? Toulmoune lé élokan ? Mi panss pa, pars pou ète élokan i fo wi fé pass dann oute diskour lo souf la vérité, épi lo souf la sinssérité. Solman toulmoune i pé bien kozé é dann toute lang wi pé bien kozé é pou sa i sifi wi gingn kozé… Pou ma par mwin la fine antande demoune ou na l’inpréssion li koné ni A ni B mé kan li koz wi ékoute ali, ou lé siréssèrtin li néna rézon, é wi san li l’apré gingn rézon avèk demoune ou lé anparmi.

Mézami zordi mi pé dir sa é mi panss pa — konm dann tan — in pé va anvoye nèrvi pou shaboul amwin kou d’galé sinploman pars mwin la koze kréol rényoné dann in landroi dabitid li lé interdi. La pa pou sa la koz lé gagné san pour san. La pa pou sa noute lang kréol rényonèz lé rokoni dann son droi épi dann droi demoune i koz noute lang kréol La Rényon.

Mé pti lanp-pti lanp mi panss nou va avanssé é si nou lé élokan, é si ni koz bien lo tan v’arivé noute lang sar rokoni dann sé droi.

A bon antandèr, salu.

Justin