Zédi soir, dann mon kartyé l’avé l’oraz, zéklèr tout. Par raport zéklèr, mi pé dir azot té konmsi lo syèl l’avé alime tout son lanp. Si ou té i rogard bien, ou té i oi klèr konm dann kèr d’solèy. Lo brui osi lété pa kouyon é pa arienk konm nou téi di dann tan lo brui moulin mayi. La pa non pli konm pétar kan i pète lo soir Zour d’lan sansa Noël. Dizon plito konmsi kanon sansa bann bonb té i ète dann tan d’guèr.

Mi koné pa pou kosa, demoun la pèr l’oraz. Etan pti, figuir azot mi souvien mon famiy té i di la priyér : zé vou salu Marie, notropèr, zé kroi an dyé épi tout sort priyèr. Kroi pa arienk bann vièye pèrsone l’avé pèr l’oraz é té d i la priyèr. Bann jenn osi, épi bann marmaye l’avé pèr z’afèr la épi téi grenn la priyèr.

Bann l’avé plis toupé, té i kont lo tan k’i éspass rant lo zéklèr épi lo loraz : i paré si ou i kont bien an ségone épi si ou i miltiplie par 350 mète ou i trouv l’androi lo tonèr la tonbé. Sa, nou lé dakor, mé kan inn é l’ot i pète ansanm, kosa k ‘i éspass ? Kosa k’i éspass ! Sinploman l’oraz la tonm dsi ou é sa sé in n’afèr moin la fine konète dé foi dann mon vi. Isi mèm La Plène épi dann péi déor. Isi inn dé zanfan la tonm malad, la gingn la séptisémi, é déor moin la vi in boug sèk an plas dsou in pyé d’pin.

Donk, l’oraz la pa in bonbon koko é i fo méfyé. Sof koméla néna paratonèr-i parétré in savan amérikin, i apèl Benjamin Franklin la invant sa. Néna sa avèk l’antène télé donk si ou lé shé ou, ou lé protézé. Si ou lé déor sa sé in n’ot afèr.

Par kont, mon vyé papa la rakont amoin in zistoir dsi loraz. I parétré, dann tan lontan, loraz té pli for ké koméla é lo loraz an késtyon té i fé tout sort de brui. Donk sa té i fé rir mon papé tan marmaye, é son vyé papa ali téi aprésyé pa. Donk shak foi li té i ri, li té gingn inklak sansa in pousé dann do. Ziska ké loraz la fé in brui près insolan é l’èrla li la pète arir sak la dfé gingna li ankor in dé kou.

Sa l éfini é mi pans koméla, i tap pi marmaye pou in kékshoz konmsa. Hin ! I tap pi marmaye pou kékshoz konmsa ? Dizon ! Mé i rèss a oir !