Bann léktèr Témoignaz i antann souvan parl la kiltir. Mèm momandoné la fé kétshoz i apèl « zarboutan nout kiltir », konm in dékorasyon pou tout bann zaktèr kiltirèl la fé in bonpé zafèr pou mète nout kiltir anlèr… Dann tan Paul Vergès lété prézidan, mi rapèl moin la gingn l’onèr asist inn-dé romiz dékorasyon mi anparl pli o, é sa lété in bien gayar sérémoni. Demoun valab la gingn dékorasyon-la é d’apré moin zot téi mérite ali bonpé.

Biensir, kan Didier Robert l’ariv prézidan La Réjyon la kass so bann romiz-la, pars lété dann l’èr di-tan téi falé kass tout sak Paul Vergès épi son bann dalon l’avé fé. An parlann Paul Vergès, mi souvien li té i di konmsa kan par tout koté l’atak la MCUR : « Promyé l’atak va port dsi la kiltir » é lé bien vré ké bann droit la port zot konba dsi la MCUR an promyé. Z’ot atak la port galman dsi lo tram-train épi dsi l’otonomi dann l’énèrji. Zot l’atak ankor lo klasman maloya dann patrimoine imatéryèl l’imanité-zot la sèye mèm drèss séga kont maloya san okin baz bien antandi.

Sé dir si dann in konba la bataye kiltirèl lé inportan. Inportan pou nou k’la touzour défann nout l’idantité rényonèz é antansyon, la pa arienk inportan pou nou mé pou tout pèp kisoi sak néna zot téritoir par zot mèm épi zot lé mète dsi zot téritoir kisoi sak i bataye pou li vnir mètr shé li. Néna désèrtin pèp san péi i fors pou défann z’ot prop kiltir é sa sé in n’afèr i amontr anou koman la kiltir sé in n’afèr k’i kont dann la vi in pèp, dann son lite pou li gngn lo droi z’ète sak li lé pou vréman.

Astèr mi an souvien kékshoz : laba dann Kuba kan L’URSS la fèrm son také ékan lo péi l’artrouv ali tousèl pou gingn son nésésèr lo komité santral lété trakasé pou la révolisyon pars té riskab kapoté. I paré Fidel Castro la di avèk lo gouvèrnman épi lo komité santral : i fo fors dsi la kiltir pars sé la kiltir i pé pèrmète konbate lo zidé inpèryalis.

Mi di pa sa sé lo sèl solisyon pou nou, mé ala kant mèm in pyèr konm i di pou konstrui La Rényon domin. Mi pans pa mi tronp la dsi é mi pans pa non pli nout parti i tronp dsi in késtyon kapital konmsa.