Na poin lontan dsa, mi an souvien tré bien, moin té anparmi in bann kamarad é na plizyèr pou dir zot lé pa tro sir nou na rézon zordi san pour san épi osi k’i fo pran prékosyon pa ète pèrdan pars in l’unyon sé in bon l’inyon si bann partnèr i ansort gagnan. Konm i di dann la formasyon profésyonèl, i fo in bon l’akor, in l’akor gagnan-gagnan.

Dann lo sobatkoz, moin la antann inn-dé parol la sazès. Na inn té i pass an rovi tout bann konba nou la améné : konba kont lo kolonyalis, konba pou bann plantèr, la lite pou travayèr, kont lo bimidom, pou nout lang kréol, kont la frod dann z’éléksyon, pou l’égalité sosyal é d’ot ankor ; pou lo maloya épi nout kiltir rényonèz. Pou koué ? Pars nout péi lé pti, napoin bonpé d’moun, mé son l’istoir lé bien fourni mèm si li lé kourt.

Aprésa la késtyon ni doi pozé sé késtyon-la : nou l’avé rézon, nou l’avé tor amenn bann konba-la si ni baz anou kosté nout pèp rényoné ? Moin mi èm bien dir in pozisyon avansé nout pèp rényoné… La répons suivan nout poinn-vizé bann vanzèr rényoné, sé nou l’avé rézon, mèm si désèrtin konba la pankor alé ziska lo bout k’i fo… Si zordi ni rod in étratézi pou fé avans konm k’i fo nout lite é si konm dopi lontan ni baz dsi in l’inyon pli larz ké nou é k’i doi ankor élarzir dann l’avnir..si ni done anou vintan pou fé avans ankor plis nout lite – la koz nout pèp !-, mi kroi ni pé dir nou na rézon.

Rézon pou donn la rou nout Rényon nouvèl !

NB Bann kamarad zot i ansouvien lo tan nout diskour té i tèrmine par « pou in rényon lib ! » é bin pou moin sé sa in Rényon nouvèl.