Mé zami, zot i koné ousa i sort lo kozman « katédral kassé » ? Pou mon par, mi koné pa, mé mi sipoz kan mi rogard in pé an aryèr : souvan dé foi, in konstruksyon téi ariv pa o bout kisoi par la fote siklone, kisoi pars lo bann batissèr lété pa tro konpétan osinonsa konm désèrtin vyé moun téi di : lo mank di motif di pourkoi .. Larzan si zot i vé.

Kan mi pass Sintandré mi rogard souvan avèk dézolasyon lo vyé légliz Champ Borne : sa lé konmsa dopi siklone Jenny (l’ané 1961 ?) d’apré sak i di. Mi rogard osi lo pti shapèl santrevil : dann tan té i fé katéshis ladan. Dizon Sintandré na poin lo monopol katédral kassé, mé li défann pa li tro mal kant mèm dsi lo poinnvizé sète afèr la.

Mé orozman tousala lé déyèr nou é ni riskopa d’artonm dann in ka konmsa. Ni riskopa ! Kisa la di sa ? Nou néna la rout an mèr é ni koné pa si i sava ariv obout. Mé inn téi sifi pa nou, néna in dézyèm l’apré ménas anou. Lo train ! Zot la zamé antann parl de sa ? Zot ikoné pa konsèye réjyonal i di k’li sava fé in train san sinkant kilomète, bout par bout, tronson par tronson : lo méyèr fason déboush dsi in katédral kassé.

O zour d’ozourdui, konm bann malkozèr i di, nou lé dsou la ménas dé katédral kassé… Avèk Vergès nou lété parti pou an avoir in rout épi in tram-train, mé avèk bann ti jéni i fé marsh La Rényon tète an ba moin lé a d’mandé si ni sava pa gingn dé katédral kassé an mèm tan pou lo pri d’dë sinploman.
Nb Kansréti pou ronoué avèk nout tradisyonn katédral kassé é si ni débrouy bien, pétète in zour-san tardé - nou va ofèr bann touris bann rouine pou vizité. Arzout èk sa inn-dé finikilèr lé kapab kalbité konm dann Zorba lo grèk, ni pé dir nou sar vèrni pou la késtyonn nout patrimoine touristik.

Justin