Oté

« Si ou i anbèk dann shomin « talèr », étone pa ou si ou i débark dsi lo plas « zamé » » .

In kozman pou la rout

Justin / 20 avril 2019

JPEG - 43.6 ko

Mi souvien kan moin lété lékol, l’avé in profésèr mat-in vré kasèr lé kui !-toultan li té i di anou : « i fo zamé fé zordi sak ou i pé roport pou lanmin ». Li té i fé pa sa li, li téi fé toutsuit pou toutsuit mé mi pans lété in fason pou li fé konprann anou shak shoz téi fé an son tan é lo tan la pa élastik. La pa in tan d’lantèrman : katrèr pou sinkèr ! Lé vré i di : « La vitès néna son tan ! », mé la pa pou sa i fo fé atann demoun. Pars si ou néna out l’anploi di tan, dmoun galman néna la z’ot... Dé foi, mi rogrète pa avoir di d’moun « moin lé pa la ! » sansa « moin la bézoin alé an vil ». Sansa ankor rakont in krak pou pa ète blizé pou atann. Atann kon i di, sa la pa in vèrb moin la invanté sa ! Alé ! Mi lèss azot rofléshi la dsi é ni artrouv pli d’van sipétadyé.