Matante zélida la ékri in lète...
Mon shèr nové, èl la di, shak zour k’i pass moin nana lamitié épi la rokonéssans pou lo pti bononm k’i diriz La Frans. Zordi, mon rokonésans la grandi pou li akoz li la di, bann demoun mon laz, sa i apèl bann sénior épi li vé fé toute i gingn in travay. Out bann la gosh lavé pa trouv in n’afèr konmsa ? Lé vré, la pa vré ? Dann la politik lé konm dann tout zafèr : nana k’nana bon-bon zidé, nana la tète lé vid konm sète bann lièv... Bouz aou spès fi d’gars !

Justin la réponn...
Mon vié matante, dizon ou i kontante aou avèk moins ké rien. Sénior ? I sar pa éskor èk sa ! Alon mazine in pé, matante : ou la travay la komine ou, dann tan défin Zan Shatèl, Sansa avan ankor ? Kass pa la tète ! Mazine in pé la tète banna kan ou va di, ou i vien arpran out plas travay. Ou i koné, kossa banna va fé : va kapaye aou épi va mète aou dann lopital bann fou... Travay la poin pou bann jène, pou bann moun réformé nora.
Ou i koné ou i fatig amoin : alé aou, épi si ou i antann i kri « kouyon », oubli pa réponn, sé ou mèm, banna i kri-la.

Justin