Demoun i domann souvan dé foi, si néna in vi apré la mor. Mi pans l’om i majine li lé si tèlman présyé ké li baz dsi in vi étèrnèl. Li di dann son kèr li va viv toultan. Mé koman ? Li mazine in paradi avèk bondyé anndan épi li, kosté koté Bondyé. Mé néna in pé i poz pa zot késtyon konmsa : zot i koné zot va mor, lo pli tar posib é aprésa ariv sak pou arivé. Kozman moin la mark an-o la, sa in kozman Madégaskar. Pou li, demoun i poz pa zot késtyon par raport légzistans Bondyé lé paré pou sote dann in gran vide ; ni pé mèm dir in néan anplis ké sa lo zyé fèrmé. Sé dir si zot lé paré pou palank dann vide ! Mi rapèl in gran lékrivin krétyin té pa loin, konm i di, pass l’ot koté épi li téi di avèk bann zoinalis : final de kont li koné pa pou vréman si néna kékshoz apré la vi, si na poin mé l’èr k’lété avèk la maladi, li téi pans li lété pa loin pou konète. Alé ! Mi kite azot rofléshi la dsi mé san fé d’mové rèv. Ni artrouv pli d’van lo tan ké nou lé ankor la dsi la tèr Bondyé konm kréol i di. Sipétadyé bien antandi !