Dann zournal sansa dann télé épi dann radio, dopi in sèrtin tan, i bonbard solman avèk l’afèr Cahuzac. Kisa i lé boug-la ? I paré, sé in ga intélizan vèy pa koman. Arzout èk sa, li té shirirzien. Armèt èk sa, li lé vèrsé pou fé biznès. Épi li té bon konm sobatkozèr : Moin la antann ali dann télé é sak i kroiz lo fèr èk li na intéré protèz son molèr. Pa pars li lé boksèr... li lé boksèr réèlman, mé pars son bann kozman i détrui son l’advèrsèr an dé tan troi mouvman.

Bon pou sa mèm, mé i fo kroir li la pa in boug pridan pars li la fini par fé koins ali. Par koman sa l’arivé ? Konm dan “Dallas”, l’ariv in zour, afors zoué èk dofé, li la fini par bril son doi. Demoun la fini par dénons ali, é domoun té prosh dé li. Dan tout ménaz, i ariv in grogn…*. An plis ké sa, lo boug té i frékant bann l’éstrèm droit. Sé konm sa k’in zour, li la fini par trouv in dalon, Marine Le Pen, la ésplik ali koman i démay avèk lo biznès internasional, é la mèm, figuir azot, rouv in kont dann in bank an Suisse pou li.

Antansion, mi anparl in moun l’avé son kart dann parti sosialis é la fé la politik pou parti-la. Mé alor, pou kosa li la pa rant dan l’UMP, sansa dann Fron nasional ? Sé solon lo ka. Kan la droit lé for, la zénès doré i rant dann in parti la droit, mé kan sé la gosh sosialis ké lé for, i rant dann parti sosialis… konm di Balzac, Rastignac, sa i mak pa !

Mé Cahuzac, a s’ki paré, sé konm i marmay l’ékol, é na pli for ké li. Kisa ? Lo ga l’amèn kanpagn konm trézorié pou Hollande. Boug-la, a s’ki paré, nana z’aksion dan bann sosiété off shore bazé dan bann z’il Kaïman. Na d’ot ankor, é i tard pa mèt zot nom dann journal. Nou va oir firamézir, mé na in patoi i shanj pa. In patoi k’i di konm sa : frékant lo shien é ou va gingn lo pis. Sak lé dann in ka konm sa, li na intéré marsh èk in boutèy produi.

* Tout J.R. na son Sue Ellen ! 

Justin