In zétoil dann syèl sa sé in kékshoz réspé dé z’o. Néna biensir é sirman in bon takon mé bann tout pti zékli i gingn pa ète in zétoil é sirman li lé pli nonbré ankor. Sa lé bien vré ! Mé sa i anpèsh pa bann zékli égzisté. Sak lé gran, lé gran é sak lé pti lé pti. Shakinn son valèr mé lé vré pou désèrtin zot valèr lé rokoni, pou d’ot zot i pass in pé san k’i oi zot. Sa lé vré pou bann zétoil épi pou tout z’obzé volan idantifyé, mé pou la sosyété, Médam é mésyé, dopi ké la tèr sé la tèr é l’manité sé l’imanité, listoir dopi k’èl la komansé, la touzour amontr anou, pou in rézon ni koné pa touzour bien néna d’moun zot valèr lété de tou tan pli rokoni ké d’ot. Zot mèm si mi poz azot lo nom désèrtin moun sélèb-donk bann zétoil si zot i vé - mi pans pa zot va done lo nom zot gra-papa, sansa la myène moin lé sir zot va lèss lo nom demoun la lèss in tras dann listoir. Sa lé normal mé sa i vé pa dir lé z’ot, bann zanonime, sa i kont pa. La pa bann sélébrité, lé vré, mé ni pé dir kant mèm momandoné zot la tienbo z’ot plass dann la sosyété é sa i fo pa bliyé pars rozman zot té la, momandoné, é zot la zoué in bon rol d’itilité. Alé ! Mi kite azot rofléshi la dsi é ni artrouv pli d’van. Sipétadyé !