Oté

« Si ou i grinp dsi pyé d’boi, lèss pa out passdoi an ba »

In kozman pou la rout

Justin / 9 mé 2018

JPEG - 43.6 ko

Mi pans pa in moun i pé di amoin sa in mové konsèye pars sirman ou va rotourn out kaz pyé tou ni é si ou la rash dsi in liane pagode ou nora souvnans… Sa i rapèl amoin in zistoir vré dsi bann zorflin la Krèz. Zistoir in marmaye olèrk rant dirèk kaz son granmèr la mont dsi pyé zamalak pou kass in pé. In marmaye la domann ali fé sa. Li la dépoz son sak nèv an ba é lo marmaye la parti avèk son sak. So pti sèr té anba galman la kriyé mé san rézilta. Astèr li vé pi rant kaz son granmèr, li la pèr i tap ali. Mé la loi la trap ali avèk son pti sèr épi zot la rotrouv azot dann l’égzil. Dann tan té i fé konmsa é konm zot i koné plis démil marmaye la artrouv azot dann péi déor, rashé avèk z’ot famiy. Alé ! Mi lèss azot rofléshi dsi lo déstin bann zanfan rényoné dann in sèrtin tan é mi di azot, pou banna, zordi ankor sa i port lo nom « déportasyon ». Ni artrouv pi d’van. Sipétadyé !