Mi sort lir dann zournal na san dis mil pèrsone nana difiklté pou lir fransé. Mi romark, sa i diminié pa. Poitan, sa lé konm in maladi. In pé i di konmsa, in moun i koné pa lir, sé konm in moun andikapé sosial. Lo mo lé in pé for, mé pa si tan.

Mi souvien, nana lontan, dann mon kartié lavé in boug lavé lo pourkoi an sifizans ! Li lavé mèm in kamion pou transport le sab li, gravié li, siman li, é konm dann tan, batiman la komans dévlopé, li lavé de koi pou gonf son pla. Solman, in sèl z’afèr, li té konète pa lir... son madam oui, mé la pa tout sort de shoz i fo alé souf dann zorèy out tantine !

Donkalor, in zour, li gingn in lète ofisièl baba ! I sort tribinal. Li sé d’kap lo lète, épi li sava la boutik, li domann komèrsan pou rann ali in pé sèrvis é lir son lète. Shinoi, malis, i oi lo lète i sort tribinal, i rogard, di pa arien. Inn-dé konpèr, dann bivète, i fé lo ta, i di : « lir sa té ! ».

Shinoi sé d’pran son kouraz é li di : « Sa in konvokasion pou tribinal, ou lé konvoké pou éskrokri ! ». Le boug, lo zié i karkiy, épi i di : « kossa i vé dir éskroki ? ». Pèrsone i koz pa : in pé pars zot i koné pa, in pé akoz sa i jènn azot. Lo boug li, avèk son papié pandante dann son min, i ardi : « Éskroki, sé kossa sa ? ».

Sa sé pou dir, ni viv dann in sosiété, si ou i koné pa lir, ou i pé ète bien mal anm... nuiyé !

Justin