Oté

« Si ou i koz in bonpé, na dé shans ou i di bonpé la kouyonis ! »

In kozman pou la rout

Justin / 31 out 2018

JPEG - 43.6 ko

Souvan dé foi, kan mi ékout désèrtin radyo moin lé a d’mandé ousa bann demoun i tir tousa kozman, mi anshèv dir, san ké ni tète. Mèm in pé pars zot lé in pé izazé, zot i fini par kroir zot néna in bon l’opinyon dsi tout sizé. Lé vré, si ou i fé travaye out koko, out mémoir, si ou i pran shé l’inn épi shé l’ot sak i sanm d’apré ou lé bon, ou i pé bonifyé avèk lo tan. Mé si ou i ramas tout kalité la kouyonad shé lé z’inn épi shé lé z’ot, lé riskab ou i ranpli out disk dir avèk sak moin la di é kan ou i rouv out boush, kan ou i bate out lang, i ariv ké tout la kouyonad ou la anmasé i sort é lo pti pé d’bonsans ou l’avé lé pézé dsou épi i sort pa zamé. Alé ! Mi kite azot pou rofléshi la dsi é ni artrouv pli d’van. Sipétadyé !