Promyé minis la fine anons kisa lé dan son gouvèrnman : trann-kat pèrsone, disèt bononm épi disèt madanm ; an parmi nana troi pèrsone i sort bann péi l’Outre-mèr... Dopi la anons gouvèrnman, na in bonpé d’moun l’apré fé dézord. In pé i di, lé domaz la poin pèrsone La Rényon ; in pé i di zot i domann azot bien pou kosa la mèt arienk demoun i sort lé Zantiy, sansa La guyane, é la mèm pa trouv in pti l’éstrapontin pou done in moun La Rényon.

Dabor, i fo ni koné, in minis la Gouadloup i sava pa arienk okip la Gouadloup ; in minis la Guiyane i sava pa arienk okip la Guiyane. In minis sa i okip son ministèr épi zénéralman bann problèm la Frans. Mé soman, i fo kant mèm ni poz so késtyon pou oir si nana in l’ésplikasyon... Akoz promyé minis la pans té pa nésésèr nonm in minis i sort La Rényon, é pou komansé in minis na son kart dann Parti sosyalis isi La Rényon ?

Pétèt ni pé di, pou sa i fo in moun lé rouvèr dsi bann problèm la Frans, l’Erop épi lo Mond. Mi pans pa dann parti sosyalis nana dmoun konmsa. Pars, konm di lo kont, zot lé pli for pou rogard bann problèm par lo pti bout la long-vi, plito ké par lo bout normal. Sa lé pa vré dann Parti kominis, pars nana désèrtèn pèrsone i tyinbo kont bann problèm l’Afrik, bann problèm la défans la natir, bann problèm la guèr, la pé. In l’égzanp ? Paul Vergès ; la pa li lé prézidan l’ONERC, la pa li la okip bann z’il ? la pa li èk d’ot kamarad la parti manifèst la-ba dann Danemark ? Donk i fo tyinbo kont kisa nana l’éspri anklavé é kisa nana l’éspri rouvèr.

I fo tyinbo kont in n’ot afèr : kisa lé trèt dann z’éléksyon réjyonal, kisa la fé bat Paul Vergès épi lé résponsab tout déga ni koné dépi 2010 ? Vergoz, bien sir, mé lé zot dirijan, kosa zot la fé ? Arien. Donk zordi, si prézidan la Répiblik i rogard azot an méfyans, lé normal ; sak lé trèt in foi i pé èt trèt in dézyèm foi, in troizyèm foi, étsétéra-étsétéra, la ké lo ra.

Final de kont, si ou i krash anlèr, sa lé riskab artonm dsi out né ! Ala pou kosa na poin minis rényoné.

Justin