Oté

« Si ou i manz avèk Grandyab i fo out kuiyèr néna gran mansh »

In kozman pou la rout

Justin / 4 zwiyé 2019

JPEG - 43.6 ko

Ala in kozman i sort dann HaÏti - in proverb péi laba dann zantiy pa tro loin par raport l’amérik : li lé dann loséan atlantik é nou isi nou lé dann loséan indien. Li fé parti sak i apèl gran zantiy é nou nou lé dann Maskarègn. Mé sak lé vré laba, lé vré galman isi shé nou. Lo dyab sé lo mal é néna in bon pé d’moun i sign kontra avèk lo mal. Ou i antann par isi in pé i transport la drog, par laba néna in pé i détourn larzan, l’ot koté i fé tout sort kalité krime ou i gingn mèm pa maziné. Mète out doi dsi marmite sho, va rash out po. Sign zakor avèk lo mal é ou va fé mal aou galman. Sé pou sa, lé pa konséyé, mé si ou la désidé sign kontra avèk lo mal kroi pa ou i sava sort prop ladan. Di aou bien, i fo ou i port antansyon zour é nuite, nuite é zour, pars si ou i pans ou néna lé zarm kont lo mal, di aou galman lo mal néna lé zarm kont ou. Si out kuiyèr néna gran mansh, kuiyèr grandyab galaman lo mansh lé long. Alé ! Mi kite azot rofléshi la dsi é ni artrou pli d’van. Sipétadyé !