Sa moin lé sir, kozman-la tout kréol La Rényon la fine antann, kansréti in foi. Nout tout i koné piman. Pou kosa ni pran ali ? Pou done la valèr nout kary. Pars si i di, dann in kari lo sèl la klé, lé sir san piman lo kari-désèrtin pars i mète pa piman dann tout !- i mank kékshhoz dodan. Solman si ou i vé manz tro, manz aou ! Mé aprésa, kan ou v’alé la sèl, mi di pa ou. Astèr dan la vi, dann kèl ka i pé ansèrv désa ? Kan ou égzazèr dann kéksshoz ou i èm pars zordi lébon, domin lé éstra-bon, mé i ariv in zour, afors abizé, ou i ariv pi kontrolé, é kan ou i ariv pi kontrolé, malèr pou ou. Pétète zot i pans pa konm moin ? Pétète zot i pans mi égzazèr, I fé arien, shakinn i oi l‘èr dsi son mont-braslé. Alé ! ni artrouv pli d’van.