Oté

« Si ou i marsh dann la salté, ou i koup pa out pyé, ou i lav ali »

In kozman pou la rout

Justin / 26 zwiyé 2018

JPEG - 43.6 ko

Ala in drol proverb. Moin la pa antann sa La Rényon, dann la boush demoun, mé moin la lir ali in plas, dann in léktir. Kosa li vé dir sans prop ? Zot i koné néna dmoun i siport pa la vi é pétète lodèr kk. Moin la mèm koni d’moun i atann z’ot mari rotourn la kaz pou shanj koush z’ot bébé… Moin la koni galman demoun an adorasyon dovan z’ot kk, mé sa sé in n’ot afèr néna in rapor avèk la psikyatri. Astèr pou lo sans figiré : par ébzanp si ou la fé in bèl kouyonad, ou ésèye ratrapé. Mi pans pa lo prézidan Macron i sava démisione son post pars li lé bien an-nuiyé. Li vé gard lésansyèl mé konm di lo kont sépa si l’ésansyèl i vé gard ali. Alé ! Mi lèss azot rofléshi é ni artrouv pli d’van. Sipétadyé !