Oté

« Si ou i marsh tète an lèr, ou lé riskab pa oir la m… »

In kozman pou la rout

Justin / 19 out 2019

JPEG - 43.6 ko

Mésyé, médam, la sosyété, samdi nou la anparl provèrb-la, mé kan mi ropans mi trouv néna d’ot shoz pou di dsi sa. Konm par ébzanp lo sans figiré nou la mèm pa anparlé. Sans figiré sansa dizon in sans pli zénéral in l’invitasyon pou atir l’atansyon d’moun dsi in n’afèr : I fo port atansyon dsi sak ou i fé. Mi koné pa si zot lé konm moin in pé tète-an-lèr, é dann in ka konmsa mi souète sa va amenn azot pou fé atansyon sak zot l’apré fé. Dabor pou fé lé shoz avèk soin avèk pridans galman, kaziman avèk méfyans pars l’èr ou pran lé shoz lézèrman sé l’èr i ariv aou in problèm. Pou mon par, shak foi mi mète an aksyon mon sèrvèl zoizo shak foi mi rogrète pars néna toultan in l’inkonvényan moin téi pans mèm pa sa té i doi ariv amoin. Donk nout kozman lé la pou tir signal d’alarm : nou lé loinn la m…, nou lé loin galman par rapor la tète an lèr fizikman. Sinploman port antansyon dsi sak nou l’apré fé. Alé ! Kozé lé bon, mé mi invite azot sinploman pou rofléshi dsi nout kozman zordi, é ni artrouv pli d’van. Sipétadyé !