Kan La Rénion la komans armète anlèr son kiltir, son lang kréol, na in bonpé dmoun la di sa in pèrte de tan, pli pir, sa in manièr pou sépar La Rénion avèk la Frans. Rozman, lavé dmoun antété akoz zot téi oi in pé pli loin, akoz galman daoir lavé in bézoin dann kèr bann rénioné, nout kiltir la avans pti pa pti pa, konmsa la niabou révèy nout mizik lontan, nout bann zistoir, épi nout lang la pa mor.

Akoz mi di sa ? Akoz in bon dalon a moin la anvoy in nouvèl l’Alsace pou moin : i di konm de koi demoun la bandone z’ot lang, l’alsacien, la bandone l’allemand, vik inn téi sèrv pou aprann l’ot, zordi na moin demoun i koné bien koz l’allemand. Pétète zot va di amoin mi koz la boush rouvèr ! Akout la suite :

Alor, kossa i ariv ? Bann z’alsacien, konm zot i koz moin l’allemand, i gingn moin travay dan la Suisse alémanik oussa na travay an gaspiy, plis ké dan la Frans, épi lé bien péyé. Alor zot i oi koman lo problèm la lang, la kiltir, i pé, si i pran mové désizion, anklav demoun dann zot vi, zot karièr, épi z’ot métié... Si ou marsh tète anlèr, ou lé riskab marsh dann in mové zafèr, épi pétète kass out zanm si ou la glissé.

Justin