Mi sort lir in n’afèr, a s’ki paré, sé Bertolt Brecht la di, d’apré sak i di. Donk li la di, si lo pèp lé pa dakor avèk lo gouvèrnman, lo gouvèrnman i doi disoud lo pèp ! Sa in drol z’afèr, pars sa i rosanm bien kékshoz i apèl la diktatir. Mé pé sfèr osi, i fo konprann son kozman o dézyèm dégré. Konm sé kékshoz absird i fé konprann aou, konm de koi, sa la pa in n’afèr posib pou fèr.

Astèr, ni pé pans in n’ot sénario. Sète-la i fé konprann aou konm de koi lo konba pou out bann zidé sa i amenn zour pou zour san arété. Si lé shoz i marsh korèk é bin out bann zidé i fini par gagné é si li gingn, sa i vé dir momandoné li lé majoritèr dann lo péi. Antansyon, la pa pars in zidé lé jus ké momandoné la majorité d’moun lé pou so zidé-la . Pou kosa ? Mi oi omoins dé rézon : promyé rézon ou la pa fé avans out zidé konm k’i fo, dézyèm rézon out l’advèrsèr la mont in bob, i apèl la démagoji é ou la pa trouv la réplik l’èr k’i fo é konm k’i fo. Romark bien lé dé i pé fé in mayaz ansanm avèk !

Solman mi pé dir azot é mi pans zot sar dakor avèk moin, kan in l’idé i ranfors, i ranfors mèm é la pi moiyin pou kal ali. Na poin in l’idé pli for ké sak i dovien majoritèr. Mi pans moin la konète bann kouran konmsa é si mon kèr I arête pa d’in kou m’a konète ankor d’ot kouran konmsa. Avann fini, moin na in kozman pou dir mon bann kamarad : si ou I konbate pou in zidé, ou I pé pèrd lo match, mé si ou I konbate pa, lo match ou la fine déza pèrd ali d’avans !