Kozman-la, sa i sort dann bannzil zantiy, mé li pé sort La Rényon, konm Madégaskar, Komor é lé z’ot zandroi tropikal. Lé sir si ou néna in pyé mang dann out kour la pa mang va mank aou. Kisoi mang rogaye, kisoi mang grèf, kisoi mang karote pou fé salad avèk piman sansa pou manz sa jone avèk piman désélé… La Rényon, d’apré sak i di, néna plizyèr dizène kalité mang é sa mi pans sé kant mèm nout rishès anou késtyonn frui, késtyonn konsèrv, késtyonn konfitir... Zot i koné in n’afèr zot, kan moin téi sava katéshis, avèk mon bann kamarad, moin téi bonbard pyé mang kout valval é sa téi komans promyé flèr, pou fini dèrnyé flèr. Dizon nou lété an avans dsi nout tan é ni doi kontinyé konmsa. Kansréti avèk lo prinsip la sékirité alimantèr. Alé ! Mi kite azot rofléshi la dsi é ni rotrouv pli d’van sipétadyé.