Matant Zélida la ékrir Justin :

Mon shèr nové, mon spès salté, rouj de fon dovan l’éternité, mi sa dir aou in n’afèr, mi pans pa ou i sar rir, pars sa ankor, sanm pou moin, sé sirman in pé in l’invansyon bann rouj. Po koué mi di sa ? Pars si ou i ékout so bann mésyé la lang bien tayé : in plant la pa bézoin l’angré, la pa bézoin dézèrban, mèm la pa bézoin k’i aroz. I paré sa lé initil konplètman ! La lé tro for pars si lo moun lé konmsa pa bézoin donn manjé, pa bézoin donn a boir, la mèm pa bézoin donn médikaman... Lash amoin inpé ! Na d’moun i fou d’la tèt lé z’ot la. Zot i pans nou la tyé kouyon pou kapar son plas. Tok ! Pran sa pou toué !

Justin la fé pou répons :

Mon vyé matant k’i koz toultan la boush rouvèr, i étone pa moin in n’afèr konmsa d’ou. Si i di aou i aroz pa tro, solon ou, va fé krèv lo plant avèk la soif. Si i di mète pa l’angré shimik, pou ou sa vé dir va fé krèv lo plant san manzé. Si i mète pa dézèrban, ala ké solon ou, mové zèrb va tyé lo plant. Ayayay matant ! Ou i konpran pa k’i di aou solman aroz pa bann plant an éksé é si zot la bézoin vréman. Pou la nouritir, in sol bien nouri va donn manjé bann plant konm k’i fo. Bann plant z’ot tour, va donn manjé la tèr. Tanka dézèrban si ou i vé ou i pran lo sho osinon d’ot bon zafèr ankor. Matant out gougnardaz i pas pa ! Out kasaz ti boi i fé konm lo dsi fèy sonz, out kouyonis i kas par boute. Tok ! Pran sa pou ou !

Matant Zélida I ropik ali :

Donk si mi suiv aou la mèr I débord ar pa alor pars klima i shof ar pa, si mi priv mon bann plant… épi koi ankor ? Domin I raz gratuit si I suiv aou ! Alé, manj m’a péyé don ! Tok ! Pran sa pou ou !

Justin i arréponn ali :

Matant zélida, ou i fé lo kouyon osinonsa ou lé koutyon pou l bon ? Ni pouré diskite lontan, mé si ou lé pa d’bone foi, lé pa itil koz sèryé avèk ou. Mète dé koté out politik politisyène, sa i ansèrv pa d’arien. Atansion kan ou va komans réflèshi sar pétète fine tro tar. Tok ! Pran sa pou ou !